Dy v*ktima në Vaun e Dejës/ DINAMIKA e ngjarjes: Ambulanca e zonës ishte me defekt, ajo e Shkodrës u vonua!
Sipas Qendrës Kombëtare të Urgjencës Mjekësore, aksidenti në fjalë përfshiu dy episode të ndara, ku shkaku i vdekjes në të dyja rastet ishte kontakti me rrymën elektrike në kohë të ndryshme.
Në episodin e parë, një infermiere që ndodhej në vendin e ngjarjes tentoi t’i jepte ndihmën e parë viktimës përmes masazhit kardiak, megjithatë përpjekjet e saj për ta rikthyer në jetë rezultuan të pasuksesshme.
Regjistrimet e urgjencës tregojnë se thirrja për ndihmë është pranuar në orën 18:03, por në atë çast, automjeti i urgjencës së Vaut të Dejës nuk ishte në gjendje pune për shkak të një prishjeje teknike.
Kjo situatë diktoi dërgimin e një ambulance nga Spitali i Shkodrës, e cila mbërriti në destinacion në orën 19:44. Pavarësisht faktit se ekipi mjekësor vazhdoi ndërhyrjet reanimatore deri në momentin kur pacienti arriti në spital, nuk u bë e mundur rikthimi i shenjave jetësore dhe ai ndërroi jetë.
Më pas, ndodhi rasti i dytë, ku një elektricist, i cili kishte mbërritur për të riparuar defektin, pësoi fatin e njëjtë teksa po përpiqej të ndërhynte, duke gjetur vdekjen si pasojë e goditjes elektrike.
Njoftimi për këtë rast të dytë u regjistrua në sistemin e urgjencës në orën 18:53, ndërkohë që vlerësimi fillestar i mjekëve tregoi se viktima nuk kishte më shenja jete.
Një tjetër ambulancë nga Shkodra u nis drejt vendngjarjes, ku mbërriti në orën 19:54, dhe rasti u klasifikua menjëherë si “Kod i Zi”.
QKUM bën me dije se goditjet nga rryma elektrike janë emergjenca mjekësore tejet të rrezikshme që mund të shpien në ndalim të aktivitetit kardiak dhe vdekje të menjëhershme.
Në komunikimin zyrtar, Qendra Kombëtare e Urgjencës Mjekësore përcjell ngushëllimet për familjarët e viktimave, duke shprehur keqardhje të thellë për humbjen e jetëve.
“Përtej çdo sqarimi institucional, kjo mbetet para së gjithash një ngjarje tragjike, e cila solli humbjen e dy jetëve njerëzore”, thuhet në reagimin e QKUM.
